كتقرب مواعيد الشفوي ديال ولوج المدارس العليا للأساتذة (ENS)، التربية والتكوين (ESEF)، وكليات علوم التربية (FSE)، بزاف ديال الطلبة كيقلقو: شنو الأسئلة اللي كيطرحو؟ كيفاش نوجد؟ وكيفاش نتعامل مع اللجنة؟
فهاد المقال، غادي نشارك معاكم أهم الأسئلة المتوقعة، مع نماذج للأجوبة، ونصائح باش تدوز الشفوي مرتاح وواثق من راسك.
الأصناف ديال الأسئلة ف الامتحان الشفوي
الأسئلة كيتقسمو لثلاثة أصناف:
- أسئلة شخصية
- أسئلة متعلقة بالتخصص
- أسئلة عامة أو تربوية
مايمكنش يتسول كل مترشح فجميع الأصناف، ممكن لجنة تسولك فواحد وتخلي الآخر.
1. أسئلة شخصية (تعريف بالنفس)
سؤال: عرف لينا راسك.
جواب: كتقول: الاسم والنسب، السن، مكان السكن، الشعبة اللي قريتي فيها الباك، والمعدل ديالك.
سؤال: علاش اخترتي المدرسة العليا للأساتذة/التربية والتكوين؟
جواب مقترح: حيت المدرسة كتقدم تكوين جيد فالتخصص اللي بغيت، وكاتوافق الرغبة ديالي فالتدريس.
2. أسئلة متعلقة بالتخصص
سؤال: علاش اخترتي هاد التخصص بالضبط؟
جواب: خاص تكون عارف التخصص، والموديلات اللي فيه، وآفاق الخدمة ديالو.
سؤال: شنو كتعرف على المدرسة اللي غادوز فيها الشفوي؟
جواب: تقول سنة التأسيس، المميزات، والمواد اللي كاتقري فيها.
سؤال: شنو هي أهم المواصفات اللي خاص الأستاذ يتوفر عليها؟
جواب: إلمام بالتخصص، تكوين تربوي، احترام التلاميذ، حسن المعاملة، وضبط القسم.
3. أسئلة عامة ومواقف واقعية
مثال: لو جا عندك تلميذ فشعبة العلوم التجريبية وبغى يبدل الشعبة ديالو ومايمكنش يتبدل، شنو تدير؟
جواب: نحاول نشرح ليه المزايا ديال الشعبته ونعاون إداريا إذا كان ممكن.
مثال آخر: كان عندك تلميذ مشاغب ولكن مجتهد، كيفاش تتعامل معاه؟
جواب: ندوي معاه على انفراد ونوضح ليه أن السلوك ديالو غايأثر عليه سلبيا.
أسئلة شخصية واستفزازية ممكن تجي
- واش خدمتي شي خدمة من قبل؟
- شكون كيصرف عليك؟
- واش متأكد أنك بغيتي تدير التعليم؟
نصيحة: جاوب بهدوء، ابتسامة خفيفة، وما تخليش الأسئلة الاستفزازية تخرجك من التركيز.
نصائح ذهبية باش تنجح ف الامتحان الشفوي
- حضر بكري للامتحان، الانتظار بزاف كايخلق التوتر.
- راقب مظهرك الخارجي: اللباس يكون محترم.
- شد عينيك مع اللجنة، بلا ما تحدق ولا تهرب بنظرك.
- جاوب ببساطة، بلا مثاليات زايدة.
- حضر جميع الوثائق باش مايتقصاكش غير بسبب ورقة ناقصة.
- الأسئلة ديال التخصص غالبا من برنامج الباك، ماشي ضروري تراجع بزاف.
بلغة شنو تجاوب؟
- تخصصات عربية/تربية إسلامية/فلسفة/اجتماعيات → جاوب بالعربية
- تخصصات علمية (PC, SVT, Math) → جاوب بالفرنسية غالبا
- تخصص الإنجليزية → جاوب بالإنجليزية
